Category: Íblástiur

  • Eg eri farin við rákinum

    Eg eri farin við rákinum

    4. mars 2019

    Bundnir fýrakantar
    Bindiroynbdir

    Eg eri farin við rákinum. Eg ætli mær at brúka tað, sum eg eigi, áðrenn eg keypi nýtt tógv. 
    Eg eigi nógv tógv. Og nógv ymisk sløg. Tað mesta er ull og bummull. Okkurt er silki, lín og blandingar av fleiri sløgum. Eg eigi næstan einki tógv í acryl, polyester, polamid, nylon ella øðrum plastiktógvi. Tí mær dámar ikki at binda við plastiktógvið, hóast eg væl veit, at tað í summum førum styrkir tráin, um eitt sindur av nylonl er í – eitt nú í sokkatógvið. Tað ringasta við plastiktógvið og klæðum gjørd úr hesum tóvgvið er, at tá vit vaska tað, útloysir tað mikroplast, sum fer við frárenslinum út á sjógv. Tí havi eg valt at brúka minst møguligt av tógvið, sum er framleitt úr olju ella platiktilfari.
    Eg havi rudda og skilt tógvið, so nú er lættari at fara í gongd. Tað mesta tógvið er ullint frá teimum føroysku tógvmerkjunum. Eg havi eitt-, tvey- og trýtráða, í ymsum litum. So eigi eg nokk so nógv bummullstógv.

    Endamálið við ruddingini hesaferð var, at kanna hvussu nógv tógv, eg eigi, og hvat slag  tað er. Eg hugnaði mær í tilgongdini, hvørt noða hevur sína søgu. Okkurt er rest av onkrum gomlum plaggi. Okkurt, sum var ætla til ávíst endamál, men ongantíð bleiv tit tað. Okkurt minnist eg nær, og hvar eg keypti tað,  og hvør avgreiddi meg í handlinum. Eg minnist eisini onkra samrøðu ella hvørjum eg møtti í handlinum, tá eg keypti tógvið.
    Í tilgongdini koma nógvir taknar fram, um alt møguligt. Og so øll hugskotini sum floymdu inn yvir meg, um hvat eg skal brúka tógvið til. Eg neyt løtuna. Hesaferð gjørdi eg mær eina ætlan, um hvat tógvið skal brúkast til. Ikki alt, men nógv av tí. 

    Eg byrjaði beinanvegin, at binda úr tí ullinta, sum eg havi mest av. Tað skal bindast til eitt teppi úr fýrakantum í ymiskum litum. Eg valdi at binda á stokkum nr. 6 og við trý tráðaðum tógvið. Eg valdi trýtráðað, tí tað er skjótt at binda – og so fái eg brúkt næsta alt tað ullinta tógvið. Eg bindi við fleiri tráðum í senn, fyri at fáa alt í somu tjúgd. Eg blandi eisini litirnar saman. 

    Bummullstógvið ætli eg at binda ella hekla lappar, handklæði, vatttottar og møguliga okkurt annað úr. 

    Ein onnur ætlan er, at brúka tógv úr tógvgoymslumi til nakrar lampuskermar, sum hava ligið leingi og bíða eftir mær. Eg havi hugsað nógv um, hvussu og hvat eg skal binda uppá skermarnar. Ella um eg skal gera okkurt heilt annað við teir.

    So sá eg ein so flottan lampuskerm, sum Karin starvsfelagið mín, hevði gjørt úr ymiskum tógvrestum. Eg tók hugskotið til mín, men visti ikki rættuliga, um eg átti tógv í røttum litum. Nú havi eg valt tógvið til skermanar. Tógvið er av ymiskum slagi og í ymsum litum. Tað góða við at brúka tógvið til lampuskermar er, at eg kann brúka alt slag av tógvið, tí skermanir verða ikki vaskaðir. Tað vil siga, tað fer einki mikroplast á sjógv við vaskingini.
    Eg havi nógvar aðrar ætlanir, um hvat eg skal brúka tógvið til. Eg havi tógv til minst eitt ársbrúk, so tað ræður um ikki at freistast, tá eg renni meg í spennandi tógv. 
    Góða eyðnu við bindifestivalinum 2019
    Elin Lindenskov

  • Sniðgev og bind egnan lampuskerm

    Sniðgev og bind egnan lampuskerm

    18.oktober 2014

    Lampuskermanir hanga í Norðurlandahúsinum restina av árinum.

    Seinasta vikuskifti var eg á eini spennandi bindiðverkstovu í Norðurlandahúsinum. Undirvísarar á veðurstovuni vóru sniðgevarnir Lone Stidsen og Hans Christian Madsen, sum bæði eru útbúgvin tekstilsniðgevar við binding sum sergrein. Lone granskar og hevur eina Ph.d. í ljóssniðgeving, Hans Christian er bindisniðgevi  hjá mótafyritøkuni Burberry.

    Sum íblásturin til at binda okkara egnu lampuskermar, vóru tveir áhugaverdir fyrilestrar. Lone tosaði um, hvussu vit brúka ljós í ymiskum samanhangum, meðan Hans Christian tosaði um fyritøkuna Burberry, sum hevur eina søgu heilt aftur til 1856.

    Tá vit byrjaðu, fingu vit lampustell í trimum ymiskum støddum, sum vit so skuldu sniðgeva og binda til, hekla ella brúka aðrar teknikkir. Tilfarið og stokkar høvdu vit við heimanífrá. Tað var ein spennandi tilgongd, tí vit eru so ymisk og hava hvør sína tilgongd til tilfarið. Flestu okkara bundu skermarnar, onkur heklaði ella nevaði um lampustelli. Tilfarið var somuleiðis ymiskt mest ull ella annað vanligt tógv í ymiskum litum og tjúktum. Ein skermur var bundin við filminum úr einum videobandið, ein við basti og onkur royndi seg við plastikki. Alt er loyvt, tó er umráðandi at hugsa um, hvørja ljósperu tú brúkar, tað besta er at brúka eina kalda peru t.v.s. spariperu, LED ella veika gløðiperu. Um tú brúkar sterkar gløðiperu, kann hon gerast ov heit og eldur koma í skermin.

    Eg havi bundi um teir tríggjar skermarnar, sum vit fingu á veðurstovuni, umfram at eg brúkt eitt gamalt stell, sum eg hevði liggjandi heima.

    Um tú hevur hug at binda ein lampuskerm, so kann tú brúka eitt gamalt stell. Kanna støddina á holinum til fatningin, áðrenn tú fert í gongd. Mítt gamla stell er til ein gamlan fatning, sum er minni enn teir, vit fáa í dag. Eg havi goymt fleiri gamlar fatningar, so eg brúkti ein av teimum og setti nýggjan leidning í.

    UM tú  hevur hug at binda ein lampuskerm, so spæl eitt sindur við stokkunum, hekklinálum og tógvi. Alt ber til, so tað ræður um at brúka hugflogið. Eg kastaði uppá og royndi meg fram, til eg var nøgd við úrslitið. Tað ber altíð til at rekja uppaftur, um tú ikki er nøgd. Eg havi bæði seyma og hekla skermin fasta um endarnar. Eg má viðganga, at tað er nógv skjótari at seyma enn at hekla.

  • Mín uppskrift uppá hyllublómusaft

    Mín uppskrift uppá hyllublómusaft

    8. septembur 20

    Vit hava tveir hyllurunnar (hyld á donskum) í urtagarðinum, tann eldri er setur niður fyri eini 10 – 12 árum síðani. Eg var so spent, vónaði at hyllurunnarnir fóru at blóma beinanvegin ella fáa ár eftir, at eg hevði sett teir niður. Men tað skuldi ganga lang tíð. So endiliga blómaði tann eini í fjør, men í ár síggi eg ongar blómur og hin hevur ongantíð blóma enn. Tí er tað gott, at ein stórur gamal hyllurunnur stendur í urtagarðinum hjá mínum foreldrum. Mamma fekk ein avleggara úr urtagarðinum hjá ommu og abba í Fuglafirði, fyri nógvum árum síðani. Mammusa hyllurunnur blómar nú. Eg havi heintað umleið 20 blómuskjól av honum. Tað eru hesar blómur, eg havi brúkt í mínari uppskrift.

    Hyllublómusaftin august 2014

    Eg havi brúkt

    Umleið 20 blómuskjól

    2. vistfrøðiligar sitrónir

    ½ kg. vistfrøðiligt rørsukur

    20 g. sitrónsýra

    1 l. vatn

    Fløskur við proppi

    Atamon at skola fløskurnar í

    Eg goymi fløskur við proppum, sum kunna brúkast umaftur. Onkuntíð keypi eg fløskur, um eg renni meg í onkra, sum eg haldi, er vælegnað at goym saft í.

    Soleiðis ger tú: Klipp stelkin av blómunum og skola blómuskjólini væl í køldum vatni. Sker sitrónirnar í tunnar skivur. Legg blómuskjólini í eitt ílat saman við sukri, sitrónsýru og sitrónskivurnar. Stoyt 1 litur av kókandi vatni omaná. Tá lakin er kólnaður, skal tú seta hann í kuldaskápi. Lat standa í 3 – 4 dagar. Rør í lakanum av og á. Skola fløskurnar í kókandi vatni við eitt sindur av atamoni í. Síla vætuna gjøgnum eitt klæði og stoyt í fløskurnar.

    Saftin er konsentrerað, tí skal hon tynnast við vatnið 1 part saft til 4-6 partar vatn. Drekk saftina kalda ella ger te av henni. Hyllublómute smakka væl, um tú stoytur nakrar dropar reina hyllublómusaft í ein kopp við kókaðum vatnið saman við tveimum skivum av appilsin.

    Saftin kann frystast.

    Hyllublómur
    Hyllublómusagt
    Saftin verður solda
    Hyllublómur á runninhum
  • Soleiðis kanst tú pussa messing

    Soleiðis kanst tú pussa messing

    5. desember 2013

    Eg eigi eina rúgvu av messing stakum í øllum møguligum formum, sum eg havi keypt í ymiskum endurnýtsluhandlum og á loppumarknaðum. Nakrir av stakunum er so jólaligir, at eg goymi teir millum jólaprýðið. Í kvøld havi eg pussa tríggjar av teimum jólaligu stakunum og sett hvít kertuljós í. Ljósini eru svanamerkt 100 % stearin.

    Eg tími so illa at pussa, tí standa stakarnir og onnur metalting sjáldan frammi. Seinastu dagarnar havi eg leita ymsastaðni á netinum, eftir alternativum pussiháttum. Eg fann hópin av góðum ráðum og hugskotum til at pussa messing, kopar og silvur. Her eru nøkur av ráðunum. Eg havi pussað hesar tríggjar stakarnar við tí fyrstu uppskriftini.

    Uppskrift 1.

    Tú skal brúka: Sitrónsýru og sitónuppvaskievni

    Upploys eina súpuskeið av sitrónsýru og eitt sindur av sitrónuppvaski í kókandi vatni. Legg stakan í vatnið. Lat liggja í 5 minuttir .Skola og turka av.

    Uppskrift 2.

    Tú skalt brúka: Sitrónsýru og uppvaskievni

    Fyll eitt fat við heitum vatni, upploys sitrónsýruna í vatninum. Legg messing stakan í vatnið, lat liggja í 15 minuttir. Skola stakan í vatni við uppvaskievni í og turka hann av.

    Uppskrift 3.

    Ger eina blanding soleiðis

    1 Kop av vatni

    1 kopp av ediki

    1 kopp av hveitimjøli

    2 teskeiðir av sitrónsýru

    2 teskeiðir av salti  

    Smyr blandingina á stakan og skolavið lunkaðum vatni. Turka av við bleytum klúti.

    Blanda 6 dl edik og 1 spísiskeið av salti, pussa við blandingini. Vaska við salmiak blandað 1 til 6. turka við bleytum klúti.

    Uppskrift 4

    Smyr stakan inn í tannkrem, skola við lunkaðu vatni og pussa við bleytum turrum klúti. Hetta kann eisini brúkast til silvur og kopar.

    Uppskrift 5

    Smyr stakan í reint yogurt, lat standa nakrar minuttir og pussa.

    Uppskrift 6

    Legg stakan á blot í kyrnumjólk eitt samdøgur. Pussa sum vanligt.

  • Ein mánaði til jólaaft

    Ein mánaði til jólaaft

    24. november 2012

    Um ein mánað er jólaaftan .Eg havi funnið ymisk jólatrø til íblástur. Eg gleði meg til jólahugnan saman við barnabørnunum, tá vit fara at gera jólagávur og pynt saman. Kanska tú eisini fær íblástur av hesum jólatrøunum.